АҚШнинг Юта штатида яшовчи юрист Стивен Чейс ҳар сафар операциядан кейин ҳушига келгач, кутилмаганда испан тилида гапира бошлайди. Қизиғи шундаки, у бу тилни деярли билмайди — фақат бир неча оддий сўзлар ва ўнгача санашнигина эслайди, холос.
Бу ғайриоддий ҳолат илк бор у 19 ёшида, тиззасига қилинган операциядан кейин кузатилган. Стивен тахминан 20 дақиқа давомида испан тилида равон гапирган, кейин эса ҳеч нарса бўлмагандай яна инглиз тилига қайтган. Энг ажабланарлиси, у ўша пайтда испанча гапираётганини ўзи умуман сезмаган.
Стивеннинг айтишича, мактаб даврида у испан тилини фақат бир йил ўрганган, холос. Шифокорлар эса унга жуда кам учрайдиган ҳолат — хорижий тил синдроми ташхисини қўйишган. Бу синдром мия фаолиятидаги вақтинчалик ўзгаришлар, кучли стресс ёки умумий наркоз таъсири билан боғлиқ бўлиши мумкин.
Қизиғи, бу ҳолат кейинчалик бир неча марта такрорланган. Сўнгги ўн йил ичида у бир неча операцияни бошдан кечирган ва ҳар сафар ҳушига келгач, аввал испанча гапира бошлаган, кейин эса она тили — инглиз тилига қайта олган.
Стивен бу ҳолат сабабини болалигида лотин америкаликлар орасида кўп вақт ўтказгани билан боғлайди. Унинг фикрича, ўша муҳитда эшитилган тил онг остида сақланиб қолган бўлиши мумкин.
Мутахассислар таъкидлашича, бу ҳолат хорижий талаффуз синдромидан фарқ қилади. Хорижий талаффуз синдромида одам ўз она тилида гапиради, аммо нутқида бошқа тилга хос талаффуз, оҳанг ёки урғу пайдо бўлади. Бу синдром ҳам, одатда, мия фаолиятидаги ўзгаришлар билан боғлиқ ҳолда кузатилади.
