Нью-Йорк товар биржасининг (Comex) бўлинмасида 2026 йил февраль ойида етказиб бериладиган олтин фьючерслари нархи тарихий юқори кўрсаткични қайд этди. Савдолар жараёнида қимматбаҳо металл нархи бир троя унцияси учун 4650 доллардан ошиб кетди.
Тошкент вақти билан соат 17:59 ҳолатига кўра, олтин нархи бир унция учун 4650,1 долларни ташкил этди ва кунлик ўсиш 1,11 фоизни ташкил қилди.
Соат 18:15 га келиб эса олтин қийматининг ўсиши бироз секинлашиб, нарх бир унция учун 4641,3 долларга тушди. Бу эса 0,92 фоизлик ўсишни англатади.
Шу билан бирга, Comex биржасида 2026 йил март ойида етказиб бериладиган кумуш фьючерслари ҳам тарихий рекордни янгилади. Кумуш нархи бир унция учун 91,61 долларга етди, бу эса 6,11 фоизга ўсишни ташкил қилди.
Хусусан, Тошкент вақти билан соат 18:11 да кумуш нархи бир унция учун 92,195 долларгача кўтарилиб, 6,78 фоизлик ўсиш қайд этилди.
