Россияда тиббий кўрикдан ўтиш талабларини бажармаган мигрантлар учун маъмурий жавобгарлик кучайтирилмоқда. Давлат Думаси депутатлари 10 февраль куни биринчи ўқишда тегишли қонун лойиҳасини маъқуллади.
Қонун лойиҳасига мувофиқ, чет эл фуқаролари ёки фуқаролиги бўлмаган шахслар тиббий кўрикдан ўтишдан бош тортган ёки бу жараёндан бўйин товлаган тақдирда 25 мингдан 50 минг рублгача жарима тўлашига тўғри келади. Бу амалдаги жарималарга нисбатан 12,5 бараваргача оширишни англатади.
Айни пайтда Россия қонунчилигида бундай қоидабузарлик учун 2–4 минг рубл миқдорида жарима ва маъмурий чиқариб юбориш чораси кўзда тутилган. Янги тартибга кўра, белгиланган муддатда жарима тўланмаган тақдирда у икки баравар оширилади ва мигрант мажбурий равишда мамлакатдан чиқариб юборилади.
Қонун лойиҳасида шунингдек, мигрантлар Россия ҳудудига киргандан кейин тиббий кўрикдан ўтиши шарт бўлган муддатни 90 кундан 30 кунгача қисқартириш назарда тутилган. Мамлакатда 30 кундан ортиқ қоладиган хорижликлар учун ҳар йили мажбурий тиббий кўрик жорий этилади.
Бундан ташқари, гиёҳвандлик воситалари, психотроп ёки хавфли психоактив моддалар истеъмоли, шунингдек, юқумли касалликлар ва ОИВ инфекциясини аниқлаш бўйича тиббий текширув тартибини бузган ташкилотларга 1 миллион рублгача жарима солиниши ёки 90 суткагача фаолияти тўхтатилиши мумкин.
Қонун лойиҳаси Давлат Думаси спикери Вячеслав Володин, Дума фракциялари раҳбарлари ҳамда Ирина Яровая бошчилигидаги 427 нафар депутат томонидан киритилган. Ташаббускорлар бу чора-тадбирлар мигрантлар устидан назоратни кучайтириш ва жамоат хавфсизлигини таъминлашга қаратилганини таъкидламоқда.
