Бишкекда Кампиробод сув омборининг бериб юборилишига қарши тинч намойишлар бўлиб ўтди. Марш иштирокчилари Ала-Тоо майдонигача юриб бориб, у ерда сув омборининг берилишига қарши петицияни имзолади. Бу ҳақда «24.kg» хабар бермоқда.
Иштирокчилар сув омборини Ўзбекистонга бериш ҳақидаги қарорни бекор қилишга даъват этувчи шиорлар туширилган плакатларни кўтариб олган. Йиғилганлар, шунингдек, аввалроқ қўлга олинган фаолларни озод этишни ва сиёсий таъқибларни тўхтатишни талаб қилган.
«Кампиробод бизники, репрессиялар тўхтасин!» — деган иштирокчилар.
Намойишчиларнинг асосий талаблари қуйидагилардан иборат бўлди:
Кампиробод сув омбори ва унинг ҳудуди Қирғизистон балансида қолиши керак.
Кампиробод сув омборини айирбошлаш, делимитация ва демаркация қилиш бўйича масалалар ва ишлар тўхтатилиши керак. Битим ратификация қилинмаслиги керак.
Делимитация ва демаркация масалалари бўйича давлат комиссияси қайтадан тузилиши керак.
Делимитация ва демаркация масалалари бўйича протоколлар инвентаризация қилиниши керак ва жамоатчилик учун эълон қилиниши шарт.
Сиёсий таъқиблар зудлик билан тўхтатилиши керак.
Ҳужжат президент маъмуриятига, Жогорку Кенешга ва вазирлар маҳкамасига тақдим этилиши режалаштирилмоқда. Таъкидланишича, акцияда 200 дан 300 нафаргача одам қатнашган.
2022 йил 22 октябрь куни Кампиробод сув омборини қўллаб-қувватловчи қўмита тузилганди, унга фаоллар, сиёсатчилар ва парламент депутатлари кирган. Ўша куниёқ президент Садир Жапаров «Кабар» агентлигига берган интервьюсида Кампиробод бўйича митинглар ортида кимлар тургани ҳақида ҳукумат маълумотга эга эканини айтганди.
23 октябрь куни оммавий ҳибсга олишлар бошланди. Оммавий тартибсизликлар уюштиришга уринишда гумонланиб, 20 дан ортиқ сиёсатчилар, фаоллар ва блогерлар қўлга олинди. Уларнинг уйларида тинтувлар ўтказилган. 24 октябрь куни Бишкек суди уларнинг кўпчилигини 2 ойга ҳибсга олди.
