Қирғизистон парламенти депутати Жанибек Қидиқбоев мамлакатда TikTok ижтимоий тармоғини блоклашни таклиф қилди. Депутатнинг сўзларига кўра, ушбу хизмат болаларга салбий таъсир қилади. TikTok блокланадиган бўлса, «одамлар менталитетига мос келадиган» ўқув материалларини чоп этиш кераклиги таъкидлади.
Қирғизистон парламенти (Jogorku Kenesh) депутати Жанибек Қидиқбоев мамлакатда TikTok ижтимоий тармоғини блоклашни таклиф қилди. Бу ҳақда Sputnik хабар берди.
Депутатнинг таъкидлашича, ушбу хизмат болаларга салбий таъсир қилади.
« TikTok’да қандай рекламалар кўрсатилаётганини ўзингиз кўрасиз. Наркомания, ароқ реклама қилади, таналар ҳам кўрсатилади. Қирғиз менталитетига тўғри келмайдиган нарсаларни эълон қилишади. Болаларга нима зарар етказиши мумкинлигини кўряпсизми, таҳлил қиласизми? Балки TikTok’ни ёпиш керакдир?» — деди Қидиқбоев.
Қирғизистон маданият, ахборот, спорт ва ёшлар сиёсати вазирининг ўринбосари Чингиз Эсенгул депутатлар билан бўладиган шахсий учрашувда бу борада ўз фикрини билдиришини айтди.
«Агар ота-оналар фарзандларига смартфон совға қилмаса ёки назорат қилса, ёмон ҳодисалар бўлмасди. Ҳар йили тадбирлар ўтказамиз, чора кўрамиз», — деди вазир ўринбосари.
Қидиқбоевнинг сўзларига кўра, агар ижтимоий тармоққа кириш имкони чекланса, «одамлар менталитетига мос келадиган» ўқув материалларини чоп этиш керак бўлади.
