Хитойда май ойидан бери биринчи марта коронавирус билан оғриган бемор вафот этди, деб хабар бермоқда Пекин партия қўмитаси расмий газетаси Beijing Daily.
Коронавирусга чалинган 87 ёшли эркак 19 ноябрь куни Пекинда вафот этган. Ташхис 11 ноябрь куни қўйилган, ўша пайтда уни қуруқ йўтал безота қилаётган эди. Икки кундан кейин унга пневмония ташхиси қўйилди. 19 ноябрга келиб, бу ўпкада оғир бактериал инфекцияга айланди ва эркак септик шокга тушди.
Септик шок — сепсиснинг оғир шакли бўлиб, унда инфекция ички органларнинг фаолиятини бузади ва қон босимининг кескин пасайишига олиб келади. Ушбу синдромли беморда қон айланиши бузилади. Кислород ва бошқа фойдали моддалар тўқималарга ютилмайди, оқибатда полиорган етишмовчилиги ривожланади.
Хитойда ўтган сутка давомида 24 435 кишида коронавирус инфекцияси аниқланди, дея хабар берди ХХР Миллий соғлиқни сақлаш комиссияси.
Хитойга хорижликларнинг кириши бўйича чекловлар енгиллашганидан сўнг, ноябрь ойида мамлакатда COVID-19 билан касалланиш ҳолатлари ошиб кетди. Инфекцияга чалиниш Пекин, Гуанчжоу ва Чунцин каби муҳим шаҳарларда кузатилмоқда.
