Nemolchi.uz лойиҳаси асосчиси Ирина Матвиенко ижтимоий тармоқлардаги саҳифалари орқали ўзига ўлим билан таҳдид қилингани, шу сабабли бир муддат мамлакатни тарк этганини билдирди.
Апрел ойида номаълум шахс унга Телеграм орқали таҳдидли хабар йўллаб, уни ўлдирмоқчи экани ҳақида ёзган.
Ҳуқуқ фаолининг тан олишича, у дастлаб бу хабарга «аҳмоқона ҳазил» сифатида қараган. Лекин кейинроқ унга подъездга кириш қўрқинчли бўлиб қолган.
«Ўлим билан таҳдид қилинганидан кейин хатти-ҳаракатларим ўзгарди. Мен буни кимнингдир аҳмоқона ҳазилидек қабул қилишга ҳаракат қилдим, лекин подъездга кириш, коридор бўйлаб офисга бориш қўрқинчли бўлиб қолди. Ичкарига кириб, қўлимда учи ташқарига қараган (йўналтирилган) калит билан масофадан туриб ҳар бир бурчакни кўздан кечирдим. Зинадан лифтда эмас, пиёда юқорига ва пастга тушиб чиқдим. Эримдан майдончамизга чироқ ўрнатишни, умумий эшикка қулф осиб қўйишини сўрадим», деб ёзади у.
Матвиенко таҳдидли хабарларни психологга кўрсатган, мутахассис эса хабарнинг ёзилиш услубини руҳий касал одамникига ўхшаш деб баҳолаган.
Шундан кейин у маълум вақтга Ўзбекистонни тарк этишга қарор қилган. Ҳозирда у Грузияда бўлиб турибди
«Мен, албатта, тез орада қайтиб келаман деб ўйлайман. Ҳозирча хавфсиз жойда тинчланиб олишим керак», дея қўшимча қилган у.
У 28 апрел куни таҳдидлар юзасидан Ўзбекистон ИИВга мурожаат қилганини маълум қилган.
