Ижтимоий тармоқларда УзАуто Моторс Damas, Labo ва Chevrolet Cobalt нархларини оширгани ҳақида хабарлар тарқалди. Аввалроқ, 2024 йилнинг иккинчи ярмида ишлаб чиқариладиган Damas, Labo ва Chevrolet Cobalt русумидаги автомобиллар нархи 3,5 фоиз-6,7 фоиз доирасида қимматлаши айтилган эди. Аммо бироздан сўнг компания ўзи берган хабарни рад этиб, нархлар ошиши бўйича якуний қарор қабул қилинмаганлигини айтди.
«Узрли сабаблар номаси»га кўра, Ўзбекистон автомобиль бозорида таклифнинг ортиб бориши автомобилларнинг чакана сотувида янги ёндашувларни талаб қиларкан. Компания томонидан ишлаб чиқариш ҳажмини ошириш бўйича олиб борилган узлуксиз ишлар харидорларга “воситачиларни” четлаб ўтиб, автомобилларнинг мавжудлигини оширишга имкон берибди ва натижада, иккиламчи бозорда автомобиль нархлари кескин «пасайибди»! Ваҳолангки, автомобиль нархларини пасайтиришга шартнома очиш муддатини узайтириш ёки йил давомида бир неча марта контрактация қилиш орқали ҳам эришиш мумкин эди.
Хўш, нега айнан «Cobalt», «Damas», «Labo»?
Ўтган йилда ишлаб чиқарилган енгил автомобилларнинг энг кўп миқдори айнан Cobalt ҳиссаси(118 093)га тўғри келганини ҳисобга олсак, ўз-ўзидан бу саволга жавоб оламиз. Компания эса 2023 йил 25 – 27 декабрь кунлари «Cobalt», «Damas» ва «Labo» автомобиллари учун қарийб 171 минг 200 дан ортиқ онлайн шартномалар тузган.
УзАуто Моторс тинмай «ривожланган мамлакатларда қабул қилинган халқаро стандартларга мувофиқ автомобиллар сотув тизимини босқичма-босқич жорий этиш» ҳақида бонг урмоқда. Лекин автомобилларни магнитофонсиз ишлаб чиқариш жаҳон стандартларига тўғри келармикин?..
