27 июнь — Ўзбек тилида миллий руҳдаги илк босма нашр — “Тараққий” газетаси чиқа бошлаган сана анча йиллардан бери юртимизда журналистлар куни сифатида нишонлаб келинади. Ҳар бир касб эгалари қатори журналистлар ҳам ҳам ўз байрамларини нишонлашга ҳақли албатта.
Бугун шу касбни қисмат деб майдонга мардона кириб келган қалам аҳлини байрам билан қутлайман.
Ҳақ сўзни қўрқмай баралла айта олган, виждонинин жиғилдонидан усттун қўйган, эзгуликни ўзига шиор қилиб олган дўстларимизга байрам муборак. Қаламнинг қаттиқ нонига нонига қаноат қилиб, ўз иймонига хиёнат қилмаган фидойиларга байрам муборак! Журналист деган покиза номга ҳар жиҳатдан муносиб инсонларни байрам билан самимий қутлайман! Барчани самимий муборакбод этаман, фақат, оқимга қараб сузадиган, манфаат илинжида дуч келганни кўкларга кўтариб мақтайдиган, баъзида айтган, баъзида айтмаган гапи учун кимлардандир нималарнидир ундиришга ўрганган кимсаларни эмас. Ўзини устоз санаб, шогирдларининг йўлига тўғаноқ бўлгувчи, адолатдан сабоқ бериб, адоватга зўр берадиган “пири комилларни”ни эмас. Беш-ўнта арзон “лайк” учун шов-шув кўтарадиган, аслида отини тўғри ёзишни эплолмайдиган “интернет юлдузлари”ни эмас.
Бу кун ўз бурчини ҳалол адо этиш учун кечаю кундуз тиним билмайдиган, ҳаловатидан кечиб, ҳаққоний ва холис фикр учун жонини жабборга берадиган, матбуот, радио ва телевидениеда, интернет нашрларда, ижтимоий тармоқларда энг оғриқли мавзуларни дадил кўтариб чиқара оладиган ижодкорлар байрами. Бу кун ўзининг инсоний позициясида мустаҳкам тургани, ҳақиқатдан юз бурмагани учун турли таъқибларга учрагани, ҳатто молу жонидан кечган миллат фарзандларининг қаҳрамонлиги эътироф этиладиган кун бўлиши керак.
Маълумот учун: журналистлик дунёдаги энг хатарли касблардан бири. Биргина 2023 йилда бутун дунёда турли тартибсизликлар, қуролли ҳаракатлар ва бошқа фожиалар сабаб 99 нафар журналист ўлдирилган.
Кимгадир оғир ботган бўлса узр…
Нима бўлганда ҳам байрам яхши ўтсин, азизлар!
Рустам Иқбол
