Бу ер Ўзбекистон! Америка ёки Россия эмас! Давлат тили — ўзбек тили! Инглиз ёки рус тили эмас! Ҳолбуки ўзбек тилининг давлат тили мақомига келганига нақ 35 йил тўлди.
Аммо биз ҳали ҳануз миллий тилнинг меъёрий талаблари-ю, қадр-қимматини маънан ёинки қалбан англаб ета олмай, ерга уришда давом этяпмиз.
Бунинг учун исбот излаб тоғнинг нариги чеккасига боқишга ҳожат йўқ. Зеро далиллар, исботлар қадамда бисёр.
Мана масалан оддий бир мисол, пойтахтдан тортиб вилоят ҳудудларигача кўплаб жой ва ташкилот номлари, реклама эълонлари рус ёки инглиз тилида берилади.
Тошкент шаҳрида сотув офисларидан тортиб хизмат кўрсатиш ишларигача 100 дан 90 фоиз ҳолларда рус тилида олиб борилади. Ишга кириш учун ҳам рус тили жуда бўлмаса инглиз тилини билиш талаб даражасида. Энг ёмони, бирон ташкилот ўзбек тилида мукаммал мулоқот қилишни биласанми, деб сўрамайди. Барака топишсин.
Давлат идораларида ҳужжатларнинг ўзбек тилида йўлга қўйилишини-ку, яқингача кутиб, аранг эришдик. Ҳартугул шуниси анча йўриғига тушди.
Яна битта оддий мисол, ўзбек ота-оналари фарзандларини ўзбек мактаблари қолиб рус ёки инглиз мактабларига беришни исташади. Улар билан чет тилида ҳавасга мулоқот қилишади.
Ўқув муассасаларида ўзбек тили бир четда қолиб, чет тилида ёзилган шиорлар пештахталарни тўлдирганча савлат тўкиб туришини-ку айтмаса ҳам бўлар. Ва ҳоказо гаплар. Бундай мисолларни қадамда ҳовучлаб ҳам топиш мумкин.
Энди мантиқан хулоса қилиб айтинг-чи, «сен ўзбексан», дея оғиз кўпиртириб биз тарбия қилаётган келажак авлод бизни ҳавойи гапларимизга амал қиладими ёки босган қадамингизни бир-бир босадими?
Тил миллатнинг қалби, руҳи, ор ва номуси! Номус дунёнинг ҳар несидан-да энг азиз туйғу. Унинг қийматини асраш эса биздан, бизнинг қадамингиздан бошланади.
