Исроил ва «Ҳизбуллоҳ» жанговар ҳаракатларни тўхтатмоқда, Исроил ҳукумати ўт очишни тўхтатиш бўйича келишувни маъқуллади.
«Биз Қўшма Штатлар билан келишилган ҳолда ҳарбий ҳаракатлар учун тўлиқ эркинликни сақлаб қоламиз. Агар» Ҳизбуллоҳ» келишувни бузса – қуролланишга, инфратузилма қуришга ёки ракета учиришга ҳаракат қилса – биз зарба берамиз», деди Нетаняху.
АҚШ президенти Жо Байден эса Исроил ва «Ҳизбуллоҳ» ўртасидаги можаро тугаганини эълон қилди.
Байден Оқ уйдаги нутқи чоғида Исроил ва Ливан ҳукуматлари сулҳ таклифини қабул қилганини айтди, деб хабар берди CNN.
Унга кўра, сулҳ 27 ноябрь, чоршанба куни маҳаллий вақт билан соат 4:00 да кучга кирган. Айни пайтда барча ҳарбий ҳаракатлар тўхтатилиши керак. Бу доимий сулҳ бўлиши керак.
Бундан ташқари, у Қўшма Штатлар Ғазодаги гаровга олинганлар бўйича ўт очишни тўхтатиш ва келишувга эришиш учун яна уринишлар қилишини айтди.
Ливан Бош вазири Нажиб Микати АҚШ раҳбари билан телефон орқали гаплашгани ва унинг саъй-ҳаракатлари ва қўллаб-қувватлагани учун миннатдорчилик билдирган.
