2024 йил давомида ўтказилган назорат тадбирларида табиий газ ва электр энергиясидан ноқонуний фойдаланиш бўйича 8 минг 289 та қоидабузарлик аниқланди. Бу ҳақда «Ўзэнергоинспекция» маълум қилди.
Ушбу қонунбузарликлар оқибатида давлат манфаатларига 1 триллион 409 миллиард сўм зарар етказилган. Жумладан, электр энергияси бўйича 730,1 млрд сўм ( 91 та майнинг фермаси, 184 та АГТКШ, 1422 та сув насоси) ва табиий газ бўйича 679,1 млрд сўмлик (57 та АГТКШ, 64 та иссиқхона, 5 та охак цехи) энергия ресурслари талон-торож қилинган. Қоидабузарликка йўл қўйган 51 та АГТКШ лицензияси бекор қилинган.
Шунингдек, истеъмолчилар томонидан энергия ресурсларидан фойдаланиш қоидаларини бузиш билан боғлиқ ҳуқуқбузарликлар бўйича 9 минг 84 та маъмурий иш расмийлаштирилган.
АЁҚШ ва корхоналардан олинган таҳлил намуналаридан 189 та ҳолатда 5 млн 348 минг литр нефт маҳсулоти сифатсизлиги аниқланиб, сотувга чиқарилиши олди олинган.
Қуввати 50 кВт ва ундан юқори бўлган истеъмолчиларга берилган кўрсатмалар давомида 25 минг 730 та истеъмолчида реактив энергиясини компенсация қилиш бўйича қурилмаларни ўрнатилиши таъминланган. Натижада 26 та нимстанция ва 671 та тармоқда қувват коэффициенти кўтарилишига эришилган. Шунингдек, берилган кўрсатмаларни бажармаган 1 минг 523 та истеъмолчига маъмурий баёнома тузилган.
