Ижтимоий тармоқларда Фарғона вилоятида автомобиль йўлининг бир қисми ўпирилиб тушгани, ҳодиса оқибатида йўлдан ўтаётган «Damas» чуқурга ағдарилиб кетгани тасвирланган видеолар тарқалди.
Жорий йилнинг 23 февраль кунидан 24 февраль кунига ўтар кечаси Фарғона вилояти Бағдод тумани «Қаҳат» МФЙ ҳудудидан ўтган Д-105 «Фарғона ҳалқаси» автомобиль йўлининг 286-километрида фавқулодда ҳодиса юз берган.
Фарғона вилояти Автомобиль йўллари бош бошқармаси матбуот хизматига кўра, йўлнинг ўнг томонидан оқиб ўтувчи Фарғона каналида сув сатҳи кўпайиб автомобиль йўлининг таг қисмидан сизиб ўтиши оқибатида асфальт йўл қопламасида чўкиш юзага келган.
Мазкур ҳудудда таъмирлаш ишлари олиб борилаётгани сабабли вақтинча транспорт воситалари ҳаракати чекланган. Чеклов вақтида ушбу ҳудудни айланиб ўтишлик учун 40В 047 «Бағдод-Дашт- Ултарма» (Қўқон-Фарғона) ва 40В 046 «Янги қўрғон-Ултарма-Қақир» (Фарғона-Қўқон) автомобиль йўллари орқали ҳаракат ташкил этилган.
Мазкур автомобиль йўли 2024 йил август ойида жорий таъмирланган.
Транспорт воситаси ҳаракат жадаллиги суткасига 30 000-35 000 ташкил этади, ҳаракат вақтинча тўхтатилиб, ташкил этилган автомобиль йўлларининг 25 км.га узайган.
Фарғона вилояти Автомобиль йўллари бош бошқармаси берган маълумотига кўра, 24 февраль куни соат 18:00 га қадар автомобиль йўлида таъмирлаш ишлари якунланиб транспорт воситаларининг ҳаракати йўлга қўйилиши режалаштирилган.
