Татаристонда ўзини бой бизнесмен деб таништириб, 20 нафар аёлни алдаган никоҳ фирибгари қўлга олинди. Бу ҳақда Россия Ички ишлар вазирлиги расмий вакили Ирина Волк маълум қилди.
Маълумотларга кўра, ушбу эркак аёллар билан танишиб, уларга ўзи ҳақида ёлғон маълумот берган — у ўзини чет эл автомобилларини сотадиган тадбиркор сифатида кўрсатган. Аслида эса, у аввал ҳам жиноят содир этган ва судланган.
Фирибгар аёллар ишончини қозониш учун уларга эътибор кўрсатган, турли хизматлар қилган — масалан, машиналарини таъмирлаб берган. Бироз вақт ўтгач, у «бизнесда қийинчилик юзага келди» деб баҳона қилиб, улардан қарз сўраган ва тез орада қайтаришини ваъда қилган. Лекин пулларни олгандан сўнг изсиз йўқолган.
Ҳозирча 20 нафар аёлдан жами 44 миллион рубль ўзлаштиргани аниқланган. Полицияга янги мурожаатлар келиб тушаётгани боис, жабрланувчилар сони ва етказилган зарар яна ортиши мумкин.
Шунингдек, Ирина Волк яна бир хабарни маълум қилди: Интерпол вакиллари Қоҳирада фирибгарликда гумонланган бошқа бир шахсни Россияга топширган. У 2006–2007 йилларда банклардан катта миқдорда пул ўғирлашга ихтисослашган жиноий гуруҳ аъзоси бўлган.
