Сурхондарё вилоятида «Сариосиё» ҳудудий аэропортининг реконструкцияси якунланди. 29 апрель куни ҳаво бекати биринчи техник парвозни – SilkAvia авиакомпаниясининг АТР-72-600 самолётини қабул қилди.
Минтақавий аэропортда аэродром сунъий қопламаларининг капитал таъмири ўтказилди, хусусан, қўниш-учиш йўлагининг бутун узунлиги бўйича 1550 метр ва кенглиги 35 метр бўлган қисмида, рулёж йўлаги ва АТР-72-600 туридаги икки ҳаво кемаси сиғадиган перронда икки қатлам асфальтбетон билан қоплама қувватлантирилди.
«Сариосиё» аэропорти аэродром мажмуаси қўниш-учиш йўлагининг узоқ муддат эксплуатация қилиниши (1976 йилдан буён) сабабли, шунингдек, парвозлар хавфсизлигининг зарур даражасини таъминлаш, АТР-72 ва ундан пастроқ синфдаги ҳаво кемаларини қабул қилиш ва жўнатиш мақсадида капитал таъмирни талаб қиларди. Бугун аэропорт техник парвозни қабул қилди, бу эса аэродромнинг ҳаво кемаларини қабул қилиш ва чиқаришга тўлиқ тайёрлигини кўрсатди», — дея изоҳ беради Uzbekistan Airports матбуот хизмати.
100 гача йўловчи сиғадиган янги терминал қурилиши якунланмоқда. Барча ишлар тугагандан сўнг, бир ой ичида «Сариосиё» аэропортига мунтазам парвозлар бошланиши режалаштирилмоқда.
Эслатиб ўтамиз, «Сариосиё» сўнгги йилларда ишини қайта бошлаган бешинчи минтақавий аэропорт бўлди. Бундан олдин Мўйноқ, Қўқон, Шаҳрисабз ва Зомин аэропортлари реконструкция қилиниб, очилган эди.
