12-июн куни Ҳиндистоннинг Гужорат штатидаги Аҳмадобод шаҳридан ҳавога кўтарилган Air India авиакомпаниясига тегишли Boeing 787-8 Dreamliner самолёти қулаб тушади. Ҳалокат оқибатида 260 киши ҳалок бўлганди. Ҳиндистоннинг Авиация ҳодисаларини текшириш бюроси (AAIB) 12-июл куни эълон қилган дастлабки ҳисоботига кўра, самолёт ерга қулашидан аввал ҳар иккала двигателнинг ёқилғи таъминоти тўсатдан «ўчирилган» ҳолатга ўтган.
Ҳисоботда ҳали якуний хулоса берилмаган ва ҳеч кимни айбдор деб кўрсатилмаган. Унда айтилишича, пилотлардан бири бошқасидан нега ёқилғини ўчирганини сўраган, лекин иккинчи учувчи буни рад этган.
Самолётда 230 йўловчи (169 ҳиндистонлик, 53 британиялик, 7 португалиялик ва 1 канадалик) ҳамда 12 нафар экипаж аъзоси бўлган. Фақат бир киши — Буюк Британия фуқароси — тирик қолган, у вайроналардан мустақил равишда чиққан ва ҳозирда шифохонадан чиққан. Бундан ташқари, вазият сабаб ерда ҳам 19 киши ҳалок бўлган, бир неча одам тан жароҳати олган.
Самолёт 180 тугун (тахминан 333 км/соат) тезликка чиққанида ҳар иккала двигател кучини йўқота бошлаган: аввал биринчиси, бир сониядан кейин иккинчиси. Бунда двигателлар режими “Run” (иш ҳолати) дан “Cutoff” (ёқилғини узиш) ҳолатига ўтган.
Ҳалокатдан бир дақиқа олдин учувчилардан бири уч марта «Mayday» (фавқулодда сигнал) узатган. Самолёт аэропорт ҳудудини тарк этишга улгурмай туриб, яшаш уйларига қулаган.
The Air Current нашрига кўра, тергов қора қутилар орқали айнан ёқилғи таъминоти бошқарувига қаратилган, лекин якуний таҳлил ва хулоса чиқариш учун бир неча ой керак бўлиши мумкин.
2018-йилда АҚШ Федерал авиация маъмурияти (FAA) ёқилғи таъминоти тугмачалари билан боғлиқ муаммолар ҳақида ахборот бюллетени чиқарган. Air India эса ушбу тавсияларни мажбурий бўлмагани сабабли бажармаганини билдирган.
AAIB ҳозирча Boeing 787-8 ёки GE GEnx-1B двигатели ишлаб чиқарувчиларига бирон тавсия бермаган — бу техник носозлик аниқланмаганини кўрсатиши мумкин.
