Президент Владимир Путин 2025 йил сентябрь ойидан бошлаб Россияда мигрантлар учун янги давлат божлари жорий этилиши, илгари амалда бўлган божлар қиймати эса оширилиши тўғрисидаги қонунни имзолади.
Шунингдек, 1 сентябрьдан бошлаб, чет эл фуқароларини яшаш жойи бўйича ҳисобга қўйиш учун 500 рубл, шунингдек, вақтинча бўлиш муддатини узайтириш учун 1 минг рубл миқдорида йиғим жорий этилади.
Ишлаш учун рухсатноманинг амал қилиш муддатини узайтириш учун мигрантлар 4,2 минг рубл, унинг дубликатини бериш ёки рухсатномага тузатишлар киритиш учун эса 2,1 минг рубл тўлаши керак бўлади.
Бундан ташқари, патент бериш ёки қайта расмийлаштириш учун 4,2 минг рубл миқдорида бож амал қила бошлайди.
Мазкур қонун лойиҳаси июль ойи бошида Давлат Думасига кўриб чиқиш учун киритилган эди. Тушунтириш хатида айтилишича, давлат божлари қиймати 2014 йилда ўрнатилган ва шундан бери ўзгармаган. Шунингдек, «сезиларли миграция оқимлари» шароитида чет эл фуқароларининг Россияда бўлишини назорат қилиш ишлари «алоҳида аҳамиятга эга» экани таъкидланган.
