Коррупцияга қарши курашиш агентлиги томонидан 8,6 млрд сўмлик давлат харидида амалдаги қонун ҳужжатлари талабларига зид равишда ҳаракат қилингани маълум бўлди.
Бухоро тиббиёт институти буюртмачилигида бошланғич қиймати 8,6 млрд сўмлик “ақлли иссиқхона қуриш хизмати кўрсатиш” юзасидан ўтказилган давлат харидини ўрганиш жараёнида қатор қонунбузилиш ҳолатлари фош этилди.
Аниқланишича, танловда иштирокчилар учун рақобатни сунъий равишда чекловчи шартлар киритилган, танлов ҳужжатларида белгиланган талаблар асосида таклифлар тўлиқ ва холис баҳоланмаган ҳамда баҳолаш жараёнида қатор хатоликларга йўл қўйилган.
Агентлик тақдимномаси асосида харид комиссиясининг ғолибни аниқлаш ҳақидаги баённомалари бекор қилиниб, ноқонуний давлат харидининг олди олинди.
Шунингдек, ўрганиш ва таҳлиллар жараёнида тўпланган ҳужжатлар қонуний чора кўриш учун ҳуқуқни муҳофаза қилувчи органларга юборилди.
