Глобал иқтисодиётда магний тобора муҳим ресурсга айланмоқда. Электромобиллар, аэрокосмик саноат ва энергия технологияларида енгил ва мустаҳкам материалларга ортиб бораётган эҳтиёж магнийни “келажак металлари” даражасига кўтарди.
Бу жараёнда Ўзбекистон технологик металлар комбинати (ТМК) дунёнинг энг нуфузли саноат уюшмаларидан бири – Халқаро магний ассоциациясига (IMA) аъзо бўлди. Бу ҳақда ТМК матбуот хизмати хабар қилди. Мазкур аъзолик Ўзбекистон саноати учун уч даражадаги янги трансформацияни англатади:
Технологик даража:
Магнийни ажратиб олиш ва юқори қўшилган қийматли маҳсулот ишлаб чиқаришда илғор технологияларни ўзлаштириш;
Илмий ва интеллектуал даража:
Глобал экспертлар, лабораториялар ва илмий марказлар билан қўшма тадқиқотлар олиб бориш;
Геоиқтисодий даража:
Ўзбекистонни магний бўйича глобал таъминот занжирига улаш ва экспорт географиясини кенгайтириш.
ТМКнинг Халқаро магний ассоциациясига қўшилиши Ўзбекистоннинг барқарор саноат ривожланиши йўлидаги яна бир қатъий қадами бўлди. Чунки магний қайта ишланиши мумкин бўлган экологик материаллардан бири.
ТМК бугун ресурслардан тайёр маҳсулотларгача бўлган қиймат занжирини тўлиқ қамраб олиб, Ўзбекистоннинг янги саноат концепциясини амалда намоён этмоқда.
Маълумот учун, Халқаро магний ассоциацияси магний соҳасида билим, инновация ва сиёсат чоррахасидаги марказ бўлиб, унинг таркибида 75 дан ортиқ компаниялар, илмий марказлар ва саноат етакчилари бирлашган.
