2025 йилнинг январь-июль ойларида Ўзбекистон экспортга нисбатан кўпроқ газ импорт қилди. Бу ҳақда Spot нашри Миллий статистика қўмитасига таяниб хабар бермоқда.
Дастлабки етти ойда Туркманистон ва Россиядан газ импорти 30,6 фоизга камайиб, 734 млн долларни ташкил этди. Январь ойида табиий газ етказиб бериш 27,8 млн долларни ташкил этган бўлса, февраль ойида 8 млн долларгача, март ойида эса 2,7 млн долларгача камайди. Апрель ойида газ импорти 112 млн долларгача, май ойида 135 млн долларгача, июн ойида 286,3 млн долларгача ошди, июл ойида эса 162,2 млн долларгача камайди.
Йил бошидан буён Хитойга газ экспорти 38,2 фоизга ошиб, 438,6 млн долларга етди. Хусусан, январь ойида Хитойга 21,8 млн доллар, февралда — 20,2 млн доллар, мартда — 52,3 млн доллар, апрелда — 105,4 млн доллар, майда — 88,3 млн доллар, июнда — 66,9 млн доллар, июлда — 83,7 млн долларлик газ етказиб берилган.
Бироқ, Миллий статистика қўмитаси маълумотлари Хитой Божхона бош бошқармаси маълумотларидан бироз фарқ қилади, унга кўра Ўзбекистон январь-май ойларида 460 млн долларлик газ экспорт қилган, бу ўтган йилнинг шу кўрсаткичидан 51,2 фоизга кўпроқдир.
Бундан ташқари, Хитой божхонаси Ўзбекистондан табиий газ етказиб беришнинг ойлик ҳажми 8,95 фоизга — июн ойидаги 103,72 млн доллардан 94,43 млн долларгача (2024 йил июлига нисбатан 36,49 физга ўсиш) камайганини маълум қилди.
Хитойга газ экспорти бўйича етакчиликни жорий йилнинг дастлабки етти ойида 5,69 млрд долларлик газ етказиб берган Россия эгаллаб турибди. Иккинчи ўринда Туркманистон — 4,95 млрд доллар. Кейинги ўринларда Мьянма (922,1 млн доллар), Қозоғистон (599,5 млн доллар), шунингдек, кичик ҳажм билан АҚШ ва Италия турибди.
