Россия ҳудудида 2025 йилнинг илк ҳолати сифатида чикунгуня безгаги қайд этилди. Бу ҳақда Роспотребнадзор маълум қилди.
Тиббий маълумотларга кўра, касалланган эркак Шри-Ланкадан Москвага келган. У ўша ерда 10 кун дам олган ва қайтиб келганидан бир кун ўтиб, ўзини ёмон ҳис қилган ва шифокорга мурожаат қилган. Аввалига унда денге вируси бўлиши мумкин, деган гумон қилинган, аммо таҳлиллар чикунгуня вирусини кўрсатган.
Ҳозир бемор инфекцион шифохонада, ҳолати ўртача оғирликда деб баҳоланмоқда.
Роспотребнадзор мутахассислари барча зарур эпидемияга қарши чораларни кўрганини маълум қилган. Аҳоли орасида инфекция тарқалиши хавфи йўқлиги айтилмоқда.
«Чунки чикунгуня одамдан одамга ўтмайди, фақатгина ҳашаротларнинг чақиши орқали тарқалади. Россия ҳудудида бу вирусни ташувчи ҳашаротлар сони эса хавф даражасига етмаган.
Шунингдек, давлат чегаралари орқали ўтувчи йўловчиларни кузатиш учун «Периметр» тизими ишлаб турибди. У инфекция белгилари бўлган шахсларни тез аниқлашга ёрдам бермоқда», – дейилади Роспотребнадзор хабарида.
