Шавкат Мирзиёев Наманган вилоятига ташрифи давомида аэропорт ҳудудидаги бунёдкорлик ишларини кўздан кечирди.
140 миллион долларлик инвестиция ҳисобига қурилаётган аэропорт терминаллари бугунги Наманганнинг тараққиёт йўналишини яққол ифодалайди.
Янги 3 қаватли терминал ишга тушиши билан йўловчи ташиш қуввати 2,5 баробарга ошиши, чегара назорати ва виза хизмати, бизнес зали, савдо ва овқатланиш нуқталари, тиббиёт хонаси ҳамда Duty free дўконлари орқали меҳмонлар учун барча қулайликлар яратилиши кутилмоқда. Бу миллионлаб сайёҳни қабул қила оладиган янги салоҳият демакдир.
Аэропортда қурилаётган юк терминали эса ҳудуднинг иқтисодий келажаги учун айни муддао. Кунига 50 тонна юкни қайта ишлаш ва 90 та мамлакатга экспорт қилиш имконияти водийда ягона карго тизимини шакллантиради.
Бу маҳаллий тадбиркорлар учун катта бозор эшикларини очади, кичик ва ўрта бизнес маҳсулотларини жаҳонга олиб чиқишда ишончли йўл яратади. Янги терминал хизмат кўрсатиш соҳасида минглаб янги иш ўринлари яратишни ҳам англатади.
Умуман олганда, янги терминал Наманганнинг ўзига хос ташриф қоғозига айланиб, вилоятнинг инвестициявий, туристик ва маданий жозибадорлигини янада оширишга хизмат қилади.
