Шавкат Мирзиёевнинг БМТ Бош Ассамблеясининг 80-юбилей сессиясидаги иштироки доирасида ўтказилган тадбирларда Uzbekistan Airways миллий авиакомпанияси ўз тарихидаги энг катта шартномани имзолади.
Boeing компанияси билан тузилган 14+8 шаклидаги шартномага кўра, 14 та Boeing 787-9 Dreamliner самолёти харид қилинади ва яна 8 та шу турдаги ҳаво кемаси опцион сифатида олинади. Самолётларни етказиб бериш 2031 йилдан бошланади.
Ушбу келишув Uzbekistan Airways учун Шимолий Америка, Европа, Яқин Шарқ ва Осиё-Тинч океани минтақасига узоқ масофали парвозларни йўлга қўйиш имконини беради.
Шунингдек, Boeing ва Ўзбекистон Транспорт вазирлиги ўртасида мамлакатнинг авиация экотизимини янада ривожлантириш имкониятларини ўрганиш бўйича ҳамкорлик меморандуми ҳам имзоланди.
