Тошкентдаги собиқ “Чорсу” меҳмонхонаси ўрнида янги кўп функцияли мажмуа қурилиши жорий йил охиригача бошланади. Бу ҳақда Manar Development компанияси вакиллари 23 сентябр куни бўлиб ўтган матбуот анжуманида маълум қилди.
“Chorsu by Manar” лойиҳасига кўра, умумий майдони 100 минг квадрат метрдан ортиқ бўлган объект барпо этилади. Ҳудуднинг асосий қисми турар-жой учун (38,3 минг кв.м.), қолган қисми эса савдо майдонлари ва меҳмонхона (20 минг кв.м.дан), шунингдек, офислар (14 минг кв.м.) учун ажратилади.
Manar Development маълумотига кўра, лойиҳа таркибида халқаро даражадаги меҳмонхона, замонавий бизнес кластер, турар-жой бинолари, пиёдалар кўчалари, яшил ҳудудлар ва жамоат масканлари бўлади.
Архитектуравий концепция машҳур меъмор, Германия меъморлари уюшмаси (BDA) аъзоси Сергей Чобан (Tchoban Voss Architekten) томонидан ишлаб чиқилган.
Лойиҳа қиймати $100 млн.дан ортиқни ташкил этади. Manar Development бош директори Даврон Файзиматовнинг сўзларига кўра, қурилиш банк кредитлари жалб қилинмасдан, компаниянинг ўз маблағлари ҳисобидан молиялаштирилади.
Ижрочи директор Рустам Тўраев қурилиш ишлари шу йилнинг декабрида бошланишини айтди. Дастлабки объектлар 2028 йилда фойдаланишга топширилиши, бутун мажмуа эса 2029 йил охиригача тўлиқ якунланиши режалаштирилган.
Manar Group 2025 йил май ойида 130 млрд сўм устав капитали билан рўйхатдан ўтган бўлиб, унинг ягона таъсисчиси Пайзуллажон Мирзаев ҳисобланади. У Orient Group Management таъсисчиларидан бири бўлиб, 16,5% улушга эгалик қилади.
Manar Development раҳбарияти собиқ Golden House билан боғлиқ. Даврон Файзиматов Orient Groupда молиявий таҳлилчи, кейин Golden Houseда ривожланиш бўйича директор бўлиб ишлаган. Рустам Тўраев ҳам ушбу компанияда бир нечта раҳбарлик лавозимларини эгаллаган.
Эслатиб ўтамиз, “Чорсу” меҳмонхонаси 2020 йилда БААнинг Ittihad International Investment компаниясига 16,9 млрд сўмга сотилган эди. Бироқ компания лойиҳада иштирок этмасликка қарор қилган ва объектни янги инвесторлар гуруҳи сотиб олмоқда.
Ўтган йил ноябрь ойида Чорсу майдони реконструкция қилиниши ҳақида эълон қилинган эди. Ўшанда лойиҳа қиймати $170 млн атрофида баҳоланган эди.
