Ҳиндистоннинг Тамилнад штатида оммавий норозилик намойиши пайтида юз берган тиқилинч оқибатида ҳалок бўлганлар сони камида 33 кишига етди. Улар орасидан 6 нафар бола ва 16 нафар аёл бор. Яна 62 киши шифохонага ётқизилган.
Дастлабки маълумотларга кўра, 40 нафарга яқин одам оғир жароҳат олган. Жабрланувчилар сони яна ортиши мумкин, чунки ҳозирда вазиятни тўлиқ баҳолаш имкони йўқ. Ҳуқуқ-тартибот органлари кузатув камералари ёзувларини ўрганмоқда, ҳодиса юзасидан тергов ҳаракатлари олиб борилмоқда.
Намойишни машҳур актёр ва сиёсатчи Виджай ўтказаётган эди. Минглаб одамлар уни кўриш учун йиғилган. Виджай халққа мурожаат қилаётганда, электр таъминоти узилиб қолиб, майдон қоронғуга чўмди ва бу ҳолатда одамлар орасида саросима бошланди. Виджай чиқишини тўхтатишга мажбур бўлди.
Гувоҳларнинг айтишларича, тартибсизликлар кўпчилик сахнага яқинлашиш учун олдинга йўналганда бошланган. Айримлар ҳушидан кетган, кўплаб одамлар эса оёқлар остида қолган. Ёрдамчи гуруҳлар ва полиция аралашгунча анча одам жароҳат олди. Тез ёрдам машиналари тирбандлик сабаб зўрға йўл топа олган. Ҳатто ихтиёрий ёрдамчилар жабрланувчиларни олиб чиқиш учун тирик занжир ясашга мажбур бўлган.
