Гваделупада 60 ёшли эркак атайин қамоққа тушиш мақсадида супермаркетни талон-тарож қилди. Бу ҳақда Oddity Central нашри хабар берди.
Маълум бўлишича, эркакнинг мақсади жиноят орқали қамоққа кириш ва у ерда жазо ўтаётган набирасига ёрдам бериш бўлган. Унинг адвокати Леа Ле Шевильенинг сўзларига кўра, эркак набираси билан учрашувда уни синган тиш ва жароҳатлар билан кўрганидан кейин, уни ҳимоя қилиш ниятида шундай қарор қабул қилган.
Ҳодиса сентябрь ойи охирида оролнинг шимолидаги Сент-Роз шаҳарчасида содир бўлган. Илгари ҳеч қачон жиноят содир этмаган, собиқ ўт ўчирувчи эркак юзига ниқоб кийиб, қўлида пистолет билан супермаркетга кириб, кассадан пул талаб қилган.
Бироқ у пулни олиб қочмаган. Аксинча, дўконда қолиб, бир бўлак «Эмменталь» сири еган ва озгина вино ичган. Полиция уни ҳеч қаршиликсиз, дўкон олдидаги ўз машинаси ёнида қўлга олган. Гувоҳларнинг айтишича, у махсус равишда қўлга олинишини кутган.
Суд жараёнида у айбини тўлиқ тан олган. Судя эса унинг ҳолатини «ўта умидсизликдан қилинган ноодатий ҳаракат» сифатида баҳолаб, қамоқ жазоси тайинламасликка қарор қилган.
