Гонконг халқаро аэропортида юк ташувчи Boeing 777 самолёти ҳалокатга учради. Бу ҳақда South China Morning Post нашри ҳуқуқни муҳофаза қилувчи органлар маълумотига таяниб хабар берди.
Маълумотларга кўра, ҳодиса душанба куни тонгда, Дубайдан келаётган рейснинг қўниш пайтида содир бўлган. Самолёт қўниш йўлагидан чиқиб кетиб, денгизга тушиб кетган.
Айтилишича, у сув соҳилида турган хизмат автомобилига бориб урилган. Машинада бўлган икки кишидан бири ҳалок бўлган, иккинчиси оғир аҳволда шифохонага етказилган. Самолёт экипажидан ҳеч ким жабрланмаган.
Ҳозирда Гонконг аэропортининг шимолий қўниш йўлаги вақтинча ёпилган, ҳодиса сабаблари бўйича текширув олиб борилмоқда.
