Тошкент вилоятининг Янгийўл туманида 2005 йилда туғилган йигит OLX платформасида мавжуд бўлмаган iPhone телефонларини сотиш билан боғлиқ фирибгарликларда гумонланиб қўлга олинди.
Тергов маълумотларига кўра, у оммабоп онлайн дўконда аёллар номидан ўнга яқин аккаунт очиб, арзон нархда iPhone сотилишини эълон қилган. Харидорлар билан Telegram орқали боғланиб, олдиндан тўловларни олгач, товарни етказмасдан ғойиб бўлган.
Ҳуқуқ-тартибот идоралари ходимлари ундан жиноий фаолиятда фойдаланилган банк карталари ва телефон рақамларини мусодара қилган.
Дастлабки маълумотларга кўра, унинг ҳаракатларидан саккиз нафар фуқаро жабрланган.
Гумонланувчига нисбатан Жиноят кодексининг 168-моддаси 3-қисми “б, д” бандлари (фирибгарлик) бўйича жиноят иши қўзғатилган. Ҳозирда тергов ҳаракатлари давом этмоқда.
