Давлат хавфсизлик хизмати хабарига кўра, Наманганда фуқароларни хорижга ишга жўнатишни ваъда қилиб пул олган икки шахс қўлга олинди.
Маълум бўлишича, Наманган шаҳридаги хусусий бандлик агентлигининг норасмий ишчиси Тўрақўрғон туманида яшовчи 4 нафар фуқаронинг ишончига кириб, уларни Жанубий Кореяга ишга жўнатиш эвазига ҳар бирига 2000 АҚШ долларидан талаб қилган. У 1000 долларни олган пайтда ДХХ ва Иқтисодий жиноятларга қарши курашиш департаменти ходимлари томонидан ашёвий далиллар билан ушланган.
Бошқа ҳолатда эса Наманган шаҳридаги туристик фирма раҳбари ўз танишлари орқали бир ҳамшаҳарини Словакияга ишга жўнатиш эвазига 40 миллион сўм талаб қилган. У виза расмийлаштириш баҳонасида 600 доллар ва 2,8 миллион сўм олган пайтда қўлга тушган.
Ҳозирда ҳар икки ҳолат юзасидан уларга нисбатан Жиноят кодексининг 168-моддаси (фирибгарлик) 1-қисми билан жиноят иши қўзғатилиб, тергов ҳаракатлари олиб борилмоқда.
