Мэйо клиникаси олимлари аниқлашича, кўкрак беззи саратонининг айрим турлари замонавий даволаш усулларига жавоб бермасликка сабаб бўлувчи омил — HER2 оқсилининг қисқартирилган шакли, яъни p95HER2дир. Ушбу оқсил ўсма ичида дори воситалари етиб бормайдиган “ҳимоя муҳити”ни яратиб, касалликка қарши курашишни қийинлаштиради. Тадқиқот натижалари Nature Cancer журналида эълон қилинган.
Маълумотларга кўра, p95HER2 айрим HER2-мусбат кўкрак бези саратони турларида учрайди. Бундай турдаги саратон барча ҳолатларнинг тахминан 15–20 фоизини ташкил этади.
HER2 — ҳужайра пардасида жойлашган ретсептор бўлиб, у ҳужайранинг ўсиши ва бўлинишини тартибга солади. HER2 меъёрда бўлганда ҳужайралар назорат остида ўсади, аммо бу оқсил меъёридан ортиб кетганда ҳужайралар тез бўлина бошлайди ва ўсма фаол ривожланади.
p95HER2 эса HER2 онкопротеинидан фарқли равишда бошқача сигнал юборади. Олимлар аниқлашича, айнан мана шу сигналлар фарқи сабабли организм T-DXd дори воситасига жавоб бермайди. Бироқ лаборатория синовларида нератиниб препарати p95HER2’ни нейтраллаштириб, рак ҳужайраларидаги оқсилни тўлиқ йўқ қилишга қодир эканлиги аниқланган.
Энди олимлар нератиниб ва T-DXd комбинациясини клиник синовларда текширишни режалаштирмоқда. Ушбу усул HER2 ва p95HER2 бир вақтнинг ўзида фаоллашган ҳолатларда организмнинг ўсмага қарши жавобини кучайтира оладими, деган саволга жавоб изланади.
