АҚШ Фуқаролик ва иммиграция хизмати афғонистонлик фуқаролардан келиб тушаётган кириш сўровлари кўриб чиқилишини дарҳол тўхтатганини эълон қилди. Бу қарор президент Доналд Трампнинг Байден администрацияси даврида келган барча афғонларни текширишни талаб қилган баёнотидан сўнг кучга кирган.
Идоранинг расмий хабарида айтилишича, иммиграцион мурожаатларни кўриб чиқиш жараёнлари хавфсизлик протоколларини қайта текшириш тугагунига қадар “номаълум муддатга” тўхтатилади.
“Мамлакатимизни ҳимоя қилиш ва америкаликларнинг хавфсизлиги бизнинг мутлақ устувор вазифамиз бўлиб қолади”, — дейилади хабарда.
Бу чорага Оқ уй яқинидаги отишма сабаб бўлган. Ҳодиса оқибатида Миллий гвардия икки ҳарбийси оғир яраланган. Ўқ узган шахс 29 ёшли афғон фуқароси Раҳмонулло Лаканвал ҳам жароҳат олиб, қўлга олинган. ОАВ маълумотларига кўра, у 2021-йилда АҚШ қўшинлари Афғонистондан олиб чиқилгач, афғонларни эвакуация қилиш учун Байден маъмурияти яратган “Иттифоқчиларга салом” дастури орқали АҚШга кирган.
АБC Неwс хабарига кўра, Лаканвал 2025 йилда, Трамп Оқ Уйга қайтгандан кейин, АҚШда бошпана олган. Трамп ушбу ҳужумни “терроризм ҳаракати” деб атаб, Байден даврида мамлакатга кирган барча афғон фуқароларини тўлиқ текшириш зарурлигини таъкидлаган.
