Индонезиянинг Суматра оролида содир бўлган кучли тошқин ва кўчкилар оқибатида ҳалок бўлганлар сони 303 нафарга етди. Бу ҳақда мамлакатнинг табиий офатлар оқибатларини бартараф этиш агентлиги маълум қилди. Аввалроқ 174 киши ҳалок бўлгани ҳақида хабар берилган эди.
Агентлик раҳбари Сухарьянтонинг айтишича, энг кўп талафотлар Шимолий Суматра вилоятида кузатилган — бу ерда 166 киши ҳалок бўлган. Ачех ҳудудида 47 нафар, Ғарбий Суматрада эса 90 нафар фуқаро қурбон бўлгани тасдиқланди.
Кучли ёмғирлар бир ҳафтадан бери тўхтамай ёғиб келаётгани табиий офатга сабаб бўлди. Сел оқимлари турар-жойлар, йўллар ва инфратузилмаларга жиддий зарар етказган. Бу эса қутқарувчиларнинг жабрланган ҳудудларга киришини қийинлаштирмоқда.
