Тошкент метрополитенида йўловчилар хавфсизлигига тааллуқли ҳолат қайд этилди. Метрополитен матбуот хизмати маълум қилишича, бир йўловчининг қоидабузарлиги оқибатида поезд ҳаракати вақтинча тўхтатилган.
Маълумотларга кўра, 16 декабрь куни соат 16:23 да “Мустақиллик майдони” бекатидан “Пахтакор” бекати томон ҳаракатланиши белгиланган 16-сонли ҳаракат таркиби йўловчиларни қабул қилиб, эшикларини ёпаётган вақтда йўловчилардан бири вагонга кириш мақсадида эшикни очишга уринган.
Натижада эшикни ҳимоя қилувчи қурилма механизми ишдан чиққан. Машинист вазиятни зудлик билан бартараф этганига қарамасдан, юзага келган носозлик кейинги бекатга етмасдан яна такрорланган. Шундан сўнг машинист йўриқномага мувофиқ барча йўловчиларни бекатга тушириб, ҳаракат таркибини электродепога олиб кетган.
“Ҳурматли метрополитен йўловчилари! Метрополитен объектларида хавфсизлик талабларига қатъий риоя этишингизни ва метро мулкига зиён етказмаслигингизни сўраймиз. Биргина эътиборсизлик сиз ва бошқа йўловчилар ҳаёти учун хавф туғдириши мумкин”, — дея огоҳлантирди “Тошкент метрополитени” ДУК.
Шунингдек, “Тошкент метрополитени” ДУК метрода ҳаракатланиш қоидаларини яна бир бор эслатди:
- бекатга яқинлашганда, вагондан тушиш учун эшикларга олдиндан яқинлашинг;
- вагондан чиқаётган йўловчиларга аввало йўл беринг;
- йўловчилар тўлиқ тушиб бўлгач, вагонга киринг;
- вагонга киргач, эшик олдида туриб олманг, вагон ўртасига ҳаракатланинг;
- метро вагонлари эшикларига суянманг;
- бекат ва йўлакларда ҳаракатланишда “ўнг қўл” қоидасига амал қилинг.
