Сальвадорда одам ўғирлаш ва қотилликларда айбланган MS-13 уюшган жиноий гуруҳи аъзоларига нисбатан қаттиқ ҳукмлар чиқарилди. Мамлакат Бош прокуратурасининг маълум қилишича, жами 248 нафар жиноий тўда аъзоси 43 та қотиллик, 42 та бедарак йўқолиш ҳолати ҳамда бошқа оғир жиноятлар учун жавобгарликка тортилган.
Суд қарорига кўра, жиноий гуруҳ аъзоларидан бир нафари 1335 йил муддатга озодликдан маҳрум этилди. Яна 10 нафар шахсга эса 463 йилдан 958 йилгача озодликдан маҳрум қилиш жазоси тайинланди. Прокуратура ушбу ҳукмларни “ибратли жазо” сифатида баҳолади.
Эслатиб ўтиш жоизки, 2022 йил март ойида Сальвадор президенти Найиб Букеле уюшган жиноятчиликка қарши кенг кўламли кампания бошлаган эди. Расмий маълумотларга кўра, шу давр мобайнида тахминан 90 минг нафар шахс қўлга олинган. Кейинчалик уларнинг 8 минг нафари айбсиз деб топилиб, озод этилган. Кампания натижасида мамлакатда қотилликлар сони тарихий энг паст кўрсаткичга тушган.
Ҳукумат маълумотларига кўра, MS-13 ва Barrio 18 каби уюшган жиноий гуруҳлар сўнгги 30 йил ичида тахминан 200 минг нафар инсоннинг ҳалок бўлишига сабабчи бўлган. Маълум бир даврда бу гуруҳлар мамлакат ҳудудининг қарийб 80 фоизини назорат қилган.
Бош прокуратура билдиришича, жиноий тўдалар тадбиркорлардан “хавфсизлик” баҳонасида пул ундириб келган. Қўрқитув ва таҳдидлар сабабли кўплаб фуқаролар ўз бизнесини ёпишга мажбур бўлган. Бу ҳақда The Guardian нашри хабар берган.
