Бугун, 23 декабрь куни Ўзбекистон ва АҚШ президентларининг телефон орқали мулоқоти бўлиб ўтди, унда Шавкат Мирзиёев Маями шаҳрида бўлиб ўтадиган G20 саммитига таклиф этилди.
Қозоғистон етакчиси Қосим-Жўмарт Тўқаев ҳам худди шундай таклиф олди.
«Икки давлат билан муносабатлар фавқулодда характерга эга. Келгуси йилда Қўшма Штатлар G20 саммитига мезбонлик қилади ва биз ҳар икки етакчига ушбу ўта муҳим тадбирда меҳмон сифатида иштирок этиш учун таклифнома юборамиз,» — деб ёзди Дональд Трамп Truth ижтимоий тармоғидаги саҳифасида.
Ўзбекистон президенти матбуот хизмати хабарига кўра, суҳбатда олий даражада эришилган келишувлар ижросининг бориши, шунингдек, Ўзбекистон-АҚШ стратегик шериклик муносабатларини янада ривожлантириш истиқболлари батафсил кўриб чиқилди. Халқаро ва минтақавий аҳамиятга молик масалаларга алоҳида эътибор қаратилди. Президентлар олий даражадаги фаол мулоқотларни давом эттиришга келишиб олдилар.
Суҳбат якунида Шавкат Мирзиёев Дональд Трампни ўзига қулай вақтда Ўзбекистонга ташриф билан келишга таклиф этди.
