Ганада яшовчи ўзини пайғамбар деб атаган Эбо Ной, ёки Эбо Ҳесус, қиёмат бўлиш санасини «бекор қилди». У аввалроқ 2025 йил 25 декабр куни Ер юзида умумжаҳон тўфони бошланишини айтган эди. Унинг даъво қилишича, ҳалокатли сув тошқини уч йил давом этиши керак бўлган.
Эбо Нойнинг сўзларига кўра, унга Нӯҳ пайғамбар кемасининг замонавий кўринишини қуриш буйруғи берилган. Унинг чақирувига бир қатор издошлар жавоб берган. У ижтимоий тармоқларда одамлар қайиқлар қуриш билан шуғулланаётгани акс этган видеоларни жойлаштириб келган.
Манбаларга кўра, Нӯҳ кемаси 155 метр узунликда, 25 метр кенгликда ва 15 метр баландликда бўлган. Эбо қурдирган қайиқлар эса анча кичик бўлиб, уларда қувват берувчи қисм ва бошқарув тизимлари мавжуд эмас. Танқидчиларнинг фикрича, ушбу қурилишга сарфланган маблағлар муҳтожларга ёрдам сифатида йўналтирилиши мумкин эди.
Эбо Ной аввалроқ 2025 йил 25 декабр куни ёмғир ёғиши бошланиб, у уч йил давом этишини айтган ва бу вақтда кемада жон сақлашни режалаштирган.
Бироқ католиклар Рождествоси арафасида у янги баёнот билан чиқди. Унинг айтишича, у қурдирган 10 та кема барча хоҳловчиларни қутқариш учун етарли эмас. Шу сабабли, умумжаҳон тўфони бироз кейинга сурилган, деб хабар қилади Wion портали.
