Швейцариянинг жанубида жойлашган Кранс-Монтана чанғи курортида Янги йил байрами вақтида содир бўлган ёнғин оқибатида тахминан 40 киши ҳалок бўлди. Бу ҳақда мамлакат полицияси маълум қилди.
Ёнғин 1-январга ўтар кечаси, соат 01:30 атрофида Le Constellation номли барда юз берган. Ҳодиса оқибатида яна 115 киши жароҳатланган бўлиб, уларнинг аксарияти оғир куйиш жароҳатлари билан шифохонага ётқизилган.
Фавқулодда вазиятлар хизматлари ҳодиса жойига қисқа вақт ичида жалб этилган. Valais минтақасига 13 та вертолёт, 42 та тез ёрдам машинаси ва 150 га яқин қутқарувчи юборилган. Жароҳатланганларнинг 60 нафари Sion шаҳридаги шифохонага олиб кетилган, яна бир қисми Lozanna, Tsyurix ва Jenevadagi ихтисослашган куйиш марказларига жойлаштирилган.
Расмийларга кўра, жабрланганлар орасида турли давлатлар фуқаролари бор. Италия Ташқи ишлар вазирлиги 16 нафар Италия фуқароси бедарак йўқолганини, яна ўнлаб фуқаролари шифохоналарда даволанаётганини билдирган. Франция томони ҳам қурбонлар орасида француз фуқаролари бўлиши мумкинлигини истисно қилмаяпти.
Расмийлар ёнғин сабаблари ҳозирча аниқланмаганини, ҳодиса террорчилик ёки ҳужум билан боғлиқ эмаслигини қатъий таъкидламоқда. Бош прокуратура воқеа юзасидан тергов бошлаган, гувоҳлар сўроқ қилинмоқда, видеёзувлар ва телефонлар таҳлил учун мусодара қилинган.
Мутахассисларнинг фикрича, ёнғин қисқа вақт ичида бутун бинани қамраб олган бўлиши мумкин. Шифокорлар айрим жабрланганларда нафақат ташқи, балки ички куйишлар ҳам аниқланганини маълум қилди.
Швейцария президенти Гай Пармелен содир бўлган фожиани мамлакат тарихидаги энг даҳшатли ҳодисалардан бири деб атади. Кранс-Монтанада ҳалок бўлганлар хотирасига бағишлаб мотам тадбирлари ўтказилди.
Расмийлар ҳалок бўлганларнинг шахсини аниқлаш ва жасадларни имкони борича тезроқ яқинларига топшириш устида иш олиб борилаётганини билдирди. Махсус ишонч телефони ҳам ишга туширилган.
