Венесуэла ҳукумат органлари АҚШда ушлаб турилган мамлакат президенти Николас Мадуро ва унинг рафиқаси Силия Флоресни озод этиш бўйича махсус комиссия тузди. Бу ҳақда Боливар Республикасининг ахборот ва алоқа вазири Фредди Няньес маълум қилди.
Унинг сўзларига кўра, Вазирлар кенгаши йиғилишида президент вазифасини бажарувчи шахс томонидан президент Николас Мадуро ва унинг рафиқасини озод этиш бўйича юқори даражали комиссия ташкил этилган. Няньеснинг баёнотини РИА Новости агентлиги келтирмоқда.
Маълум қилинишича, мазкур комиссияга Венесуэла Миллий ассамблеяси раиси Хорхе Родригес раҳбарлик қилиши кутилмоқда.
Эслатиб ўтамиз, 3 январь куни АҚШ Қуролли кучлари Венесуэла ҳудудида ҳарбий операция ўтказиб, унинг давомида мамлакат раҳбари Николас Мадуро ва унинг рафиқаси Силия Флорес қўлга олинган ва мамлакатдан олиб чиқиб кетилган. Кейинчалик Мадуро Нью-Йорк шаҳридаги Бруклин тергов ҳибсхонасига жойлаштирилган.
ОАВлар маълумотларига кўра, 5 январь куни кечқурун Нью-Йорк судида Венесуэла президентига нисбатан расмий айбловлар ўқиб эшиттирилиши кутилмоқда. АҚШ Бош прокуратурасига таяниб хабар қилинишича, Мадурога наркотерроризм мақсадида фитна уюшиш, кокаин олиб киришни режалаштириш, пулемёт ва вайронкор қуролларни ноқонуний сақлаш, шунингдек АҚШга қарши пулемёт ва портловчи қуролларга эгалик қилиш бўйича фитна айбловлари қўйилган. Унга нисбатан икки марта умрбод қамоқ жазоси таҳдиди мавжуд.
Шунингдек, бир кун аввал Испания, Бразилия, Чили, Колумбия, шунингдек Уругвай ва Мексика ҳукуматлари қўшма баёнот билан чиқиб, АҚШнинг Венесуэлада ўтказган ҳарбий операциясини кескин қоралаган.
