Самарқанд вилояти Пайариқ туманида туғуруқхонада ахлат челагидан топилган чақалоқ билан боғлиқ ҳолат юзасидан унинг онаси аниқланди. Бу ҳақда вилоят Ички ишлар бошқармаси матбуот хизмати маълум қилди.
Қайд этилишича, воқеа ўтган йилнинг 27 декабрь куни Пайариқ туманидаги туғуруқхонада содир бўлган. Чақалоқ топилган пайтда у нафас олмаётган ва ўлик ҳолда бўлган. Ҳозирча унинг онаси томонидан ўлдирилгани ёки бошқа сабаб билан вафот этгани аниқ эмас.
Айни ҳолат юзасидан суд-тиббий экспертиза тайинланган. Экспертиза натижаларига кўра, чақалоқ тирик туғилганми ёки она қорнида нобуд бўлиб кейин туғилгани маълум бўлади. Дастлабки маълумотларга кўра, чақалоқ тўққиз ойлик, ўз вақтида туғилган ўғил бола бўлган.
ИИБ маълум қилишича, экспертиза хулосаси чиқмагунча аёл процессуал тартибда қўлга олинмаган. Жиноят иши қўзғатиш ва қўлга олиш масаласи ҳам шу натижаларга асосан ҳал қилинади.
Маълумотларга кўра, аёл 4 ой олдин турмушга чиққан бўлиб, туғуруқхонага қайнонаси билан мурожаат қилган. У тиббий текширувлардан бош тортган, кейинчалик эса муолажа хонасида ёлғиз қолдирилишини сўраган. Бироз вақт ўтиб, ходимлар ахлат челагидан янги туғилган чақалоқ жасадини топган.
Аёлнинг шахси видеокузатув камералари орқали аниқланган. Дастлаб у ҳолатга алоқадорлигини инкор этган, кейинги тиббий текширувлар эса туғруқ бўлганини тасдиқлаган. Ҳолат прокуратура томонидан ўрганилмоқда.
