Япониялик олимлар илгари фанга номаълум бўлган гигант (улкан) вирусни аниқладилар. “Ushiku-virus” деб номланган ушбу вирус мураккаб ҳаёт шаклларининг пайдо бўлишини ўрганишда муҳим илмий кашфиёт бўлиши мумкин. Бу ҳақда The Journal of Virology нашри хабар берди.
Токио фанлар университети тадқиқотчилари томонидан аниқланган ушбу вирус амёбалардан ажратиб олинган бўлиб, у улкан ДНК-вирусларининг камёб турига киради. Ushiku-virus ҳужайравий организмларга хос бўлган айрим хусусиятларга эга эканлиги билан бошқа вируслардан ажралиб туради.
Олимларнинг таъкидлашича, ушбу вирус муайян турдаги амёбаларни зарарлайди ва кўпайиш жараёнида «хўжайин» ҳужайранинг ядро қобиғини парчалайди. Бундай хулқ-атвор унинг механизмини мураккаб ҳужайравий жараёнларга яқинлаштиради ва қадимги вируслар эукариот (ядроли) ҳужайралар эволюциясида муҳим роль ўйнаган бўлиши мумкинлигидан далолат беради.
2001 йилда илгари сурилган “вирусли эукариогенез” назариясига кўра, вируслар эукариот ҳужайралар ядросининг шаклланишида бевосита иштирок этган бўлиши мумкин. Ushiku-virusнинг кашф этилиши мазкур гипотезани қўллаб-қувватлайди ва гигант вируслар шунчаки паразит эмас, балки ҳаётнинг илк эволюцион босқичларида фаол иштирокчи бўлганини кўрсатади.
Мутахассисларнинг фикрича, ушбу вируснинг тузилиши ва репродуктив (кўпайиш) механизмларини ўрганиш вирусларнинг ҳаёт тарихидаги ўрнини янада чуқурроқ англашга ёрдам беради.
