Ўзбекистон Республикаси АҚШ президенти Доналд Трамп таклиф этган Ғазо сектори бўйича халқаро Тинчлик кенгашига таъсисчи давлат сифатида қўшилишга тайёр.
Президент матбуот хизмати хабарига кўра, Америка Қўшма Штатлари президенти Доналд Трамп Ўзбекистон президенти Шавкат Мирзиёев номига Яқин Шарқда тинчликни мустаҳкамлаш ва можароларни ҳал этишга қаратилган янги халқаро ташаббусга қўшилиш бўйича расмий таклиф йўллаган.
Мактубда айтилишича, ушбу ташаббус 2025 йил 29 сентябрда эълон қилинган бўлиб, жаҳон етакчилари томонидан қўллаб-қувватланган ҳамда БМТ Хавфсизлик Кенгашининг 2025 йил 17 ноябрда қабул қилинган 2803-сонли резолюцияси билан маъқулланган Ғазодаги можарони тугатиш бўйича комплекс режага асосланади.
Ташаббус доирасида узоқ муддатли тинчлик, барқарорлик ва хавфсизликни таъминлаш учун масъулиятни ўз зиммасига олишга тайёр давлатларни бирлаштирувчи янги халқаро тузилма — Тинчлик кенгашини ташкил этиш кўзда тутилган.
Қайд этилишича, Ўзбекистонга мазкур кенгашга таъсисчи давлат сифатида қўшилиш таклиф этилган. Президент Шавкат Мирзиёев америкалик ҳамкасбига жавоб мактубини йўллаб, Ўзбекистон ушбу ташаббусда иштирок этишга тайёр эканини билдирган.
Давлат раҳбари ўз жавобида мазкур ташаббусни Яқин Шарқдаги кўп йиллик низоларни ҳал этиш, шунингдек, кенг минтақада тинчлик ва барқарорликни таъминлаш йўлидаги муҳим қадам сифатида баҳолаган.
