Фарғона вилояти Бувайда туманида эр ўзаро келишмовчилик сабаб болта билан хотинига жароҳат етказди.
Қайд этилишича, фуқаро Э.Р. спиртли ичимликка ружу қўйиб, кейин тузалиш йўлига ўтган бўлса-да, турмуш ўртоғи ва фарзандлари турли кинояли гапларни гапираверган. Бир сафар ўғлига пичоқ билан таҳдид қилгани учун йигит ИИБга ариза билан мурожаат қилган ва судда отага нисбатан жарима жазоси тайинланган.
2022 йил охирларида фуқаро Э.Р. рафиқаси яна турли гапларни айтганидан ғазабланиб, унинг ҳожатхонадан чиқиб келишини пойлаб турган ва аёлига ажойиб совға тайёрлаб қўйганини айтган. Хотин қанақа совға эканини сўраганида, Э.Р. уни ерга йиқитиб, шу ерда турган болтанинг орқа тарафи билан аёлнинг пешонасига урган. Эркак яна урмоқчи бўлганида аёл ўзини ҳимоя қилган ва фарзандлари етиб келиб, болтани тортиб олган.
Суд-тиббий экспертизаси хулосасида аёлга ўртача оғир даражадаги тан жароҳати етказилгани кўрсатилган. Ҳолат юзасидан жиноят иши қўзғатилган бўлиб, жабрланувчига даволаниши учун қайнотаси 1,5 минг АҚШ доллари берган.
Жиноят ишлари бўйича Бешариқ туман судида кўриб чиқилган мазкур ишда айбланувчи Э.Р. Жиноят кодексининг 105-моддаси (қасддан баданга ўртача оғир шикаст етказиш) 2-қисми билан айбли деб топилиб, 3 йилу 1 ой муддатга озодликдан маҳрум этилган.
