Сергели туманидаги 277-мактабнинг 1-синф раҳбари хато қилган ўқувчиларини жазолаш учун қўлларига игна ва «саморез» санчгани айтилмоқда. Ҳолат 2023−2024-ўқув йили бошидан буён такрорланиб келган. Болалар омбудсмани ҳолат назоратга олингани ва ўқитувчи ишдан олинганини билдирди.
Тошкент шаҳри Сергели туманидаги мактабда ўқитувчи хато қилган ўқувчиларини жазолаш учун уларнинг қўлига игна ва «саморез» санчиб келган, дея хабар берди «Дарё». Болалар омбудсмани ҳолат назоратга олинганини билдирди.
Қайд этилишича, 16 апрель куни туманнинг 277-ўрта мактабида 1-«Э» синф ўқувчиларининг 15 нафар ота-оналари мактаб директорининг ҳузурига келиб, синф раҳбари С.Р. (аёл)нинг устидан шикоят қилган.
Мурожаатда ота-оналар синф раҳбари ўқувчилар қўлининг кафт қисмини устига «саморез» ва игналар билан санчиб турли жароҳатлар етказгани, гўёки шундай усулда болаларни тарбиялашга уринганини билдиришган.
Хусусан, ҳолат 2023−2024-ўқув йили бошидан бери такрорланиб келган. Ўқитувчи болаларга бу ҳақда кимгадир айтишса, бундан баттарини қилиб, қўлларига мих тиқишини айтиб қўрқитган.
«Биринчи синф ўқувчиси эндигина ҳарф таниётган бўлса, ўқитувчи болалар қилган ҳар бир имловий хато учун уларнинг қўлига игна ва „саморез“ санчиб, болаларимизнинг жонини оғритган. Бу ҳолат анчадан бери содир бўлиб келган. Болалар қўрқитилгани учун бизга айтмаган», — деди яна бир оналардан бири.
Омбудсман хабарига кўра, шундай номақбул ҳаракатларни содир қилгани юзасидан ўқитувчи билан тузилган меҳнат шартномаси бекор қилиниб, у ишдан бўшатилган.
Ҳозирда ҳолат юзасидан Сергели тумани ИИБ томонидан терговга қадар текширув олиб борилмоқда, дейилади хабарда.
