Ўзбекистон ва Италия республикамизнинг қадимий шаҳарлари орқали хорижлик сайёҳлар учун ҳашаматли поезд қатновини йўлга қўяди. Бу Марказий Осиёдаги биринчи глобал миқёсдаги лойиҳа бўлади. Уни ишга тушириш 2026-йил охирига режалаштирилган.
Учинчи Тошкент халқаро инвестиция форуми доирасида “Ўзбекистон темир йўллари” ва “Arsenale” group ўртасида шартнома имзоланди. Хусусан, томонлар “Самарқанд экспресс” сайёҳлик поездини йўлга қўйишга келишиб олдилар. Бу ғояни ўтган йили Шавкат Мирзиёевнинг Италияга ташрифи чоғида итальян компанияси таклиф қилган эди.
Поезд “Ўзбекистон темир йўллари” корхоналарида яратилади ва 13-15 вагондан иборат бўлади. Унда 76 йўловчига мўлжалланган 38 та кенг ва нафис купе бўлади. Шунингдек, уларга биринчи даражали хизмат кўрсатиш ва панорамали деразалардан ҳайратланарли манзаралар таклиф этилади.
Ушбу ҳашаматли поезд Тошкент – Самарқанд – Бухоро – Хива йўналиши бўйича қатнови кутилмоқда, қадимий шаҳарларни боғлайди ва саёҳатчиларга Ўзбекистоннинг бой тарихий-маданий меросига шўнғиш имкониятини беради.
Маршрут бўйлаб саёҳатнинг тахминий давомийлиги Самарқанд ва Бухорода тўхташлари билан икки кеча-у уч кун. Йилига тахминан 70 дан 90 гача рейсларни амалга ошириш режалаштирилган. Поезд юқори экологик барқарорлик стандартларига жавоб бериши айтилмоқда.
Лойиҳа Ўзбекистон ҳукумати томонидан ҳар томонлама қўллаб-қувватланди, бунда туризмни рағбатлантириш ва хорижий инвестицияларни жалб қилиш бўйича катта имкониятлар мавжуд.
Эслатиб ўтамиз, бу йил 14 та Orient Silk Road Экспресс поезди Ўзбекистон шаҳарлари ва Марказий Осиёнинг бошқа мамлакатлари бўйлаб ҳаракатланади.
