Ўзбекистон ташқи ишлар вазири Бахтиёр Саидов бугун Янги Зеландиянинг мамлакатимизга янги тайинланган элчиси Марк Жулиан Трейнорни қабул қилди, деб хабар қилмоқда «Дунё» АА мухбири.
«Янги Зеландиянинг Ўзбекистондаги Элчиси этиб тайинланган Марк Жулиан Трейнор жанобларини қутладик, – деб ёзди Ўзбекистон ТИВ раҳбари ўзининг telegram-каналида.
– Икки мамлакат Ташқи ишлар вазирликлари ўзаро манфаатли ҳамкорликнинг кенг қамровли кун тартибини ишлаб чиқиш ва уни амалга оширишда муҳим ҳаракатлантирувчи куч бўлиб хизмат қилишлари лозим. Мулоқот давомида барқарор қишлоқ хўжалиги, саноатни ривожлантириш, «яшил» иқтисодиёт, тадбиркорлар ўртасидаги ҳамкорлик ва бошқа истиқболли йўналишларга эътибор қаратдик. Жаноб Элчини табриклаймиз!»
Марк Жулиан Трейнор 2023-2024 йилларда Янги Зеландиянинг Ўзбекистондаги элчиси лавозимида ишлаган Сара Мэри Уолш ўрнига тайинланди. Ўзбекистон ва Янги Зеландия ўртасидаги дипломатик муносабатлар 1992 йил 11 мартда ўрнатилган.
2019 йил 1 февралда Ўзбекистон Янги Зеландия фуқаролари учун 30 кунлик муддатга визасиз тартибни жорий қилди.
Шунингдек, Ўзбекистон ташқи ишлар вазири Бахтиёр Саидов бугун Венесуэла элчиси Росальба Ло Буе Антикони қабул қилди.
«Бугун Ташқи ишлар вазирлигида Венесуэланинг Ўзбекистондаги Элчиси Росальба Ло Буе Антико хоним билан учрашишдан мамнунмиз, – деб ёзди Ўзбекистон ТИВ раҳбари ўзининг telegram-каналида.
– Географик жойлашув жиҳатдан узоқ масофага қарамай мамлакатларимизни бир-бирига яқинлаштириш учун алоқаларни боғлашга қаратилган кўприклар барпо этишга келишиб олдик. Янги қўшма лойиҳалар ишлаб чиқиш ва амалга ошириш, парламентлараро ҳамкорликка кўмаклашиш, билим алмашинувини қўллаб-қувватлаш ва бошқа масалалар юзасидан батафсил фикр алмашдик. Элчи хоним, Ўзбекистонга хуш келибсиз!».
Янги Зеландия ва Венесуэланинг Ўзбекистондаги Элчилари тайинланди
