Буюк Британия олимлари томонидан олиб борилган илмий тадқиқот натижалари кўпчилик учун қизиқ бўлди. Хулоса қилинишича, агар одам сутка давомида беш соатдан кам ухласа, унда сурункали касалликлар ривожланиш хавфи 20 фоизга ошади. Уйқусизлик асоратлари, айниқса, ўрта ва кекса ёшли инсонлар саломатлигига кўпроқ хавф солади.
Маълумотларга кўра, ҳозир дунёда бир пайтнинг ўзида бир нечта сурункали хасталиклардан азият чекаётган беморлар сони тез суръатлар билан ўсмоқда. Айниқса, кексаларнинг ярмидан кўпи икки ёки ундан ортиқ ёндош касалликларга эга.
“Бу ҳолат уйқу давомийлиги қисқариши билан қисман боғлиқ, —дейди тадқиқот муаллифларидан бири Северин Сабиа. — Чунки мия ҳужайралари уйқу пайтида ўз ДНКларини тиклаш билан машғул бўлади. Шу боис тунда тўйиб ухламаган кишилар соғлигида бора-бора жиддий муаммолар юзага келиши мумкин”.
Тадқиқот давомида 50 ёшдан 70 ёшгача бўлган етти минг нафар иштирокчининг саломатлигидаги ўзгаришлар кузатиб борилди. Аниқланишича, кунига беш соатдан кам ухлаганларнинг бетоб бўлиш эҳтимоли кўпроқ.
Яъни уларда сурункали касалликка чалиниш хавфи тахминан 20 фоизга ошган. Шундоқ ҳам бирор хасталикдан оғрийдиган инсонларда эса юқоридаги кўрсаткич 30-40 фоизгача етган.
