Inson salomatligi — sifat ko‘rsatkichi bo‘lib, u miqdoriy parametrlar: antropometrik (bo‘y, vazn, ko‘krak qafasi hajmi, a’zolar va to‘qimalarning geometrik shakli); jismoniy (yurak urish tezligi, arterial qon bosimi, tana harorati); biokimyoviy (tanadagi kimyoviy elementlar, eritrositlar, leykositlar, gormonlar va boshqalar miqdori); biologik (ichak florasining tarkibi, virusli va infeksion kasalliklar mavjudligi) va boshqa biomarkerlardan tashkil topadi.
Inson organizmi holati uchun «norma» tushunchasi mavjud bo‘lib, bunda parametr qiymatlari tibbiyot fani va amaliyoti bilan belgilanadigan diapazonga to‘g‘ri kelishi inobatga olinadi. Qiymatning berilgan diapazondan og‘ishi, salomatlik yomonlashuvining belgisi va dalili bo‘lishi mumkin. Tashqi tomondan, sog‘likni yo‘qotish tananing tarkibiy tuzilmalari va funksiyalarida o‘lchanadigan buzilishlarda, uning moslashuvchanligi o‘zgarishida ifodalanadi.
JSST nuqtai nazaridan, odamlar sog‘lig‘i ijtimoiy sifat hisoblanadi va shu munosabat bilan aholi salomatligini baholash uchun quyidagi ko‘rsatkichlar tavsiya etiladi:
Yalpi ichki mahsulotni sog‘liqni saqlashga sarflash;
Birlamchi tibbiy yordamning mavjudligi;
Aholining immunizasiya darajasi;
Homilador ayollarni malakali xodimlar tomonidan tekshirilishi darajasi;
Bolalarning oziqlanish holati;
Bolalar o‘limi darajasi;
O‘rtacha umr ko‘rish davomiyligi.
