Жаҳон соғлиқни сақлаш ташкилоти телетиббиёт йўналишига доир янги тавсияларни ишлаб чиқди. Унда дунёнинг барча минтақаларида ушбу соҳани жадал ривожлантириш зарурлиги қайд этилган.
Аслида, масофавий тиббий хизмат кўрсатиш амалиёти соғлиқни сақлаш тизими учун янгилик эмас. Бироқ Ер шарининг нариги бурчагидан туриб бошқа олис мамлакатдаги беморни ноёб операция орқали даволашдек инновацион имкониятга бундан кейин ҳам эҳтиёж жуда катта.
Шу боис ЖССТ телетиббиётдан янада кўпроқ фойдаланиш тарафдори. Бунинг учун ҳукуматлар ўз юртида мазкур соҳани кенг жорий этиш чораларини кўришлари керак.
Ташкилотнинг Европа минтақавий бюроси томонидан олиб борилган тадқиқотлар шуни кўрсатдики, телемедицина касалликлар диагностикаси ва муолажаси, қолаверса, қатор сурункали хасталиклардан азият чекаётган беморларга узоқ муддатли тиббий хизмат кўрсатишда муҳим роль ўйнайди.
Ўрганишлар давомида Европа ва Марказий Осиёда жойлашган 53 давлатда яшовчи 20 мингдан ортиқ беморларнинг маълумотлари таҳлил қилинди.
“Биз телетиббиёт амалда катта самара бераётганига ишонч ҳосил қилдик, — дейди ЖССТ вакили. — Клиник натижалар ва тиббий ёрдам сифати яхшиланганига гувоҳ бўлдик. Бундан беморлар ҳам, шифокорлар ҳам бирдек манфаатдор”.
Бироқ соҳа ривожи йўлида жиддий тўсиқлар мавжуд. Масалан, чекка ва олис ҳудудларда интернетга уланиш имконияти паст. Қолаверса, баъзи беморларнинг телетиббиётга нисбатан муносабати салбий.
Янги тавсиялар ана шундай муаммоларни бартараф этиш орқали аҳоли саломатлигини ишончли таъминлашни кўзда тутади.
