Bir kuni ashobi kirom Rasululloh sollallohu alayhi va sallamdan hazrat Ali roziyalohu anhuning judayam yaxshi ko‘rishlarining sababini so‘rashdi. Payg‘ambar alayhisalom hazrat Alini chaqirib kelishni buyurdilar. Kelguniga qadar sahobalarga savol berdilar:
— Siz birovga yaxshilik qilsangiz-u, u sizga yomonlik qilsa, qanday yo‘l tutasiz?
Ashobi kirom roziyallohu anhum yaxshilik bilan javob qilamiz, dedilar.
Rasuli akram sollallohu alayhi va sallam yana so‘radilar:
— Agar yana yomonlik qilsa-chi?
Sahobalar indamay boshlarini egishdi. Keyin hazrat Ali keldilar. Rasululloh sollallohu alayhi va sallam so‘radilar:
— Ey Ali, kimgadir yaxshilik qilsang, u senga yomonlik qilsa, nima qilasan?
Hazrat Ali: “Yaxshilik qilaman”, dedilar. Bu savolni Payg‘ambar alayhisalom yetti marta so‘radilar, hazrat Ali roziyalohu anhu har safar: “Yaxshilik qilaman”, deb javob berdilar. Keyin: “Mening yaxshiliklarimga doim yomonlik bilan javob qaytarsa ham, unga yaxshilikda davomli bo‘laveraman”, deb qo‘shib qo‘ydilar.
Hazrat Ali roziyalohu anhuning quyidagi gaplari o‘z hollaridan xabar beradi: “Odamlarning eng yomoni yaxshilikka yomonlik qaytargani va odamlarning eng yaxshisi yomonlikka yaxshilik qilganidir”.
