Хитойда аёл тасодифан ташландиқ қудуққа тушиб кетиб, 54 соат давомида илонлар ва чивинлар орасида жон сақлади. Бу ҳақда South China Morning Post хабар берди.
Ҳодиса 13 сентябрь куни Фуцзян провинциясида юз берган. 48 ёшли аёл Гуанчжоу шаҳридаги ўрмонда сайр қилиб юрганида чуқур қудуққа тушиб кетган. Оила аъзолари уни қидириш натижа бермагач, 14 сентябрь куни аёл бедарак йўқолгани ҳақида хабар берган.
Қутқарув ишлари 15 сентябрь куни бошланган. Ўша куни аёлнинг ўғли фавқулодда қутқарув марказига мурожаат қилган. Шундан сўнг дрон билан жиҳозланган 10 кишилик махсус гуруҳ қидирув ишларига киришган. Гуруҳ бошлиғи Ду Сяоханнинг айтишича, улар соат 13:45 атрофида ёрдам сўраган заиф қичқириқни эшитиб, товуш келган томонга борган ва буталар орасида яширинган чуқур қудуқни топган.
“Кўп маротаба умидимни йўқотиб, таслим бўлгим келди. Қудуқ туби қоп-қоронғи, атрофда чивинлар, ҳатто сув илонлари ҳам сузиб юрарди. Мени кўплаб чивинлар чақди, бир марта сув илони ҳам қўлимдан тишлади. Яхшиямки, заҳарли эмас эди. Аммо 70 ёшли онам, 80 ёшли отам ва университетга эндигина кирган қизимни ўйлаб, чидашга мажбур бўлдим”, дея эслади аёл.
Қутқарувчилар уни қудуқ деворларига маҳкам ёпишиб турган ҳолатда топган. Аёл дарҳол Сзинцзян шаҳар касалхонасига етказилиб, кейинчалик даволаниш учун Куанчжоу биринчи касалхонасига кўчирилган.
Шифокорлар унинг икки қовурғаси синганини, ўпкасида эса кичик шиш пайдо бўлганини аниқлаган. Қудуқ деворига узоқ вақт ёпишиб тургани сабаб қўлларида оғир жароҳатлар ва яралар пайдо бўлган. Ҳозирда аёлнинг аҳволи барқарор, шифокорлар бир неча кунлик кузатувдан сўнг у тўлиқ соғайишини кутмоқда.
